सामना घर्ती मगर


रुकुम (पूर्व) लाउ पुथाउत्तरगंगा गाउँपालिकाय स्थानीयस्तरल उत्पादन जैसिउ स्याउय बिरुवा खरिद ओजैव छिनी किसानर दंग परिद लेर ।

वडा नम्बर १० घुम्लिबाङ लाउ किसान राइ उत्पादन याजैव स्याउय बिरुवा गाउँपालिकाय खरिद ओजैव छिनी होर खुसी ताद लेर । विगतय वर्षकिनी गाउँपालिकाय स्थानीय स्तरल उत्पादन जैसिउ बिरुवालाई प्राथमिकता मायद बाहिरनीज बिरुवा खरिद दोद रैद वितरण दोज्याउ हैलिने खाल लाउ आरोप खेप्दि याहुव लिजे ।

आउ वर्ष भने गाउँपालिकाय घुम्लिबाङल उत्पादन ताउ बिरुवा खरिद दोद वितरण जैद नैव । नर्सरील हुर्किउ बिरुवा खेर बायसँै हैलिने पिर यादोज्याउ किसानर गाउँपालिकाय बिरुवा खरिद ओजैव छिनी खुसी याताउ नरसिङ बहुउदेश्यीय कृषि फर्म लाउ नरे घर्तीय बतैद नैँव । ओल आख ओलओमि फमल हुर्किउ त हजार ६ सय ५० वटा स्याउ बिरुवा गाउँपालिकाय खरिद ओदो बतैद नैव । आगामी वर्षको लागि अ‍ैलिद सोँ हजार ७ सय बिरुवा ओजमैव पाला घर्तीय बतैद नैँव ।

यित्याउज घुम्लिबाङै भृकुटी हिमालय बहुउदेशयीय कृषि फर्मय उत्पादन ओजैव ७ सय ५० स्याउय बोट गाउँपालिकाय खरिद दोद नैँव । ओल पाला आगामी वर्षको लागि सोँ हजार ७ सय बिरुवा ओजमैजव हैलिद फर्म लाउ सञ्चालन चन्द्र घर्तीय बतैद नैव । ढाँेथो बहुउदेश्यीय कृषि फर्मय पाला ने हजार ७ सय २५ बोट सोनो बहुउदेश्यीय फलफुल नर्सरी तथा उत्पादन फर्मनी ७ सय ५० वटा स्याउय बोट गाउँपालिकाय खरिद दोद नैव ।

घुम्लिबाङ लाउ किसान राइ उत्पादन याजैव चार हजार ७ सय तोवो वता बोट गाउँपालिकाय खरिद ओजैव लिजे भने स्थानीय किसान राइ पाला बिरुवा खरिद जैद नैर् । सिँचाइय सुविधा मालेउ हो पोल होलाउ किसान राई याज रि गुरद सिचाई दोद स्याउ बिरुवा उत्पादन तथा हुरकैैद हुद लेर । दुख दैद हुरकैसिउ स्याउय बिरुवा खपत ओताउ छिनी होर दंग परिद लेर ।

पुथाउत्तरगंगा गाउँपालिका कृषि शाखाय प्रमुख ओमप्रकाश ओलीय भने सरकारी दर रेटल स्थानीय किसान राइ बिरुवा यामायक बाहिरनीज बिरुवा रैव परिने बाध्यताल यालेउ बतैद नैव । आउपाली भने किसान राइ सरकारी दर रेटल बिरुवा यारायक आलाउ बिरुवा खरिद दोद वितरण जैसिउ कृषि शाखा प्रमुख ओलीय बतैद नैव ।