रुकुम(पूर्व) को पुथाउत्तरगंगा गाउँपालिकामा नेकपा माओवादी केन्द्रले विजयी हासिल गरेको छ । गाउँपालिकाको अध्यक्ष र उपाध्यक्ष पदमा माओवादी केन्द्रले प्रतिद्धोन्दिको तुलनामा दोब्बर बढी मत लिएर विजयी हासिल गरेको छ । पालिकाको अध्यक्षमा पुनीराज घर्ती र उपाध्यक्षमा भूपेन्द्रा बुढा विजयी हुनुभएको छ ।
घर्तीले ३ हजार ९ सय १३ मत प्राप्त गर्दा उपाध्यक्ष बुढाले ४ हजार ५९ मत प्राप्त गर्नुभयो । यसैगरी प्रतिद्धोन्दी नेपाली कांग्रेसका तेजेन्द्र बुढाले २ हजार १ सय १३ मत प्राप्त गर्दा कांग्रैसकै कमलाकुमारी मल्लले दुई हजार १० मत प्राप्त गर्नुभयो ।
१४ वटा वडा रहेको यस गाउँपालिकामा ११ वटा वडामा माओवादी केन्द्रले विजयी हासिल गरेको छ भने एकएक वटा वडामा एमाले र कांग्रेसले जितेका छन् । एउटा वडा भने एमाले–कांग्रेस गठबन्धनले जितेको छ । पुथाउत्तरगंगा गाउँपालिकामा २०७४ को स्थानीय तह चुनावमा पनि माओवादी केन्द्रले नै जितेको थियो । वडाहरुमा भने १० वटामा माओवादीले जित्दा दुई दुई वटामा एमाले र कांग्रेसले जितेका थिए ।।
