कर्मसही घर्ती मगर
पोखरा, माघ २२, २०८१
कर्माफ्लाइट्स फाउन्डेसन नेपालले इज च्यारिटी युके र आयरल्याण्डको हाई क्रस कलेजसँगको सहकार्यमा सेनेटरी प्याड सिलाई सम्बन्धि तालिम सञ्चालन गरेको छ । लैंगिक समता र महिनावारी स्वास्थ्य सचेतनाको लागि पुन: प्रयोग गर्न मिल्ने सेनेटरी प्याड सिलाई सम्बन्धि १६ दिने तालिम सम्पन्न भएको हो ।
सीप विकासको लागि सिलाई तालिम जनवरी १९ देखि फेब्रुअरी ३, २०२५ सम्म पोखरा-६, बंगलादीस्थित DFG लमजुङ इन्टरप्राइज (रिभरसाइड हस्तकला उद्योग) मा सम्पन्न भएको थियो । बागलुङ, तनहुँ र कास्की जिल्लाका छ जना उत्साही स्थानीय महिलाहरूलाई उच्च गुणस्तरीय, DFG-मानक पुन: प्रयोग गर्न मिल्ने सेनेटरी प्याड उत्पादन गर्ने सीप सिकाइएको थियो ।
DFG-प्रमाणित प्रशिक्षक अनिता गुरुङको नेतृत्व, दीपक गुरुङको अभिमुखीकरण सत्रको साथ तालिम व्यावहारिक सिकाइमा केन्द्रित भएको थियो । जसले सिकाइ सहभागीहरूमा आत्मविश्वास बढ्नुका साथै दिगो महिनावारी प्याड बनाउन सिकाइएको थियोे ।
समापन समारोहका प्रमुख अतिथि पोखरा महानगरपालिकाको सामाजिक विकास विभागका वरिष्ठ अधिकृत अर्जुन न्यौपानेले कर्माफ्लाइट्स फाउन्डेसनले गरेको पहलको प्रशंसा गर्दै भने-‘प्रशिक्षार्थीहरूले आफ्नो नयाँ सीपलाई उद्यम स्थापना गर्न र महिनावारीसँग सम्बन्धित सामाजिक कलङ्क तोड्न योगदान पुर्याउन सके भने आफ्नोे र समुदायलाई नै फाइदा हुन्छ । सीपलाई व्यवसायीकरण गर्नु आवश्यक छ ।’
कर्मफ्लाइट्स फाउन्डेसनकी अध्यक्ष शर्मिला शर्माले आफ्नो सीपलाई परिष्कृत गर्न र व्यक्तिगत र व्यावसायिक दुवै प्रयासहरूमा लागू गर्न आग्रह गरिन् । उनले स्थानीय र सङ्घीय सरकारी निकायहरूसँगको सहकार्यमा शैक्षिक र व्यवसायिक तालिम मार्फत् महिला र बालबालिकालाई सशक्त बनाउन फाउन्डेसन प्रतिबद्धत भएको बताइन् ।
रंगरोगनको काम मार्फत् तीन आश्रितहरूलाई सहयोग गर्ने प्रशिक्षार्थी एकल आमा श्रीमती पार्वती दर्जीले अवसरको लागि कृतज्ञता व्यक्त गर्दै सिलाई मेसिन र कपडामा पहुँच भएमा पुन: प्रयोग गर्न सकिने प्याड बनाउने आफ्नो विश्वास रहेको बताइन् । त्यस्तै, श्रीमती कृष्णा कुमारी फगामी मगरले पहिले सिलाई अनुभव नभए पनि तालिमको प्रभावकारिता र यस्ता कार्यक्रमले जीवन परिवर्तन गर्ने सम्भावना रहेको बताएकी थिइन् ।
दिगो भविष्यतर्फ ९९% व्यवहारिक अभ्यासमा केन्द्रित तालिममा महिनावारी स्वास्थ्य र स्वच्छता व्यवस्थापन (MHHM) सम्बन्धि अभिमुखीकरण सत्रहरू पनि समावेश थिए । प्रशिक्षार्थीहरु अब सिलाई सीप मात्र होइन तर उनीहरूको समुदायका केटीहरू र महिलाहरूका लागि जागरूकता सत्रहरू सञ्चालन गर्ने ज्ञानले पनि सुसज्जित भएका थिए ।
प्रशिक्षार्थीहरुले प्रमाणपत्र र DFG पुन: प्रयोग गर्न मिल्ने प्याड किट प्राप्त गरे, जुन उनीहरूले तालिमको क्रममा आफैंले सिलाएका थिए । NEPAL-ease Charity UK र आयरल्याण्डको हाई क्रस कलेजको बलियो सहयोगमा, KarmaFlights Foundation ले नेपालभरका महिलाहरूको लागि आत्मनिर्भरता र महिनावारीको सम्मानलाई बढावा दिँदै यस पहललाई धेरै समुदायहरूमा पुग्न विस्तार गर्ने लक्ष्य राखेको छ ।
साथै कर्मफ्लाइट्स फाउन्डेसनले पोखरा र वरपरका क्षेत्रहरूमा लैङ्गिक समानता र सामाजिक कार्य (GESA) र MHHM परियोजनाहरू सुरु गरेको छ, जसले महिनावारी स्वास्थ्य शिक्षालाई प्रवर्द्धन गर्न स्कूलका विद्यार्थीहरू र किशोरकिशोरीहरूलाई लक्षित गर्दछ । यसले सामुदायिक विद्यालयहरूमा सरकार-समर्थित प्याड परियोजनालाई पूरक बनाउनेछ । मर्यादित महिनावारी स्वच्छता, आफ्नो शरीरलाई राम्रोसँग जाँच्ने र आत्म-सुरक्षा पाठहरूमा अभिमुखीकरण थप्ने कुरा रहेको कार्यक्रम निर्देशक प्रेमबहादुर कुँवरले बताए। ।
